茶餐廳手記（#801）士碌架的最高境界

　　今日早上去到茶餐廳，大家都講起趙心童贏得世界士碌架大賽冠軍，有客人唔明白，明明是枱波或者桌球，點解叫士碌架。

　　老闆話，士碌架只是桌球中的一種技術，就好似籃球入樽，不能話入樽就是籃球，而士碌架的意思就是唔俾對手打到指定的桌球，不過，現在的所謂士碌架基本上名存實亡。趙心童在決賽時與對手馬克・威廉斯打了30局，趙心童以18比12取勝，但雙方都唔知道有冇做過10個士碌架，就算有做到士碌架，以現在士碌架職業球星的水準，要救一個士碌架其實唔難，除非是士碌架最高境界，否則是自己唔小心失分比對set士碌架為多。什麼士碌架最高境界，講大家都未必相信，係佛偈嚟架，叫一葉蔽目，即是令對手任何波都打唔到。

　　特朗普如果明白什麼是一葉蔽目，就唔會向中國發起關稅，特朗普對中國開徵關稅，目的是唔准中國貨物輸往美國，但特朗普可能唔知道，輸往美國的貨物只佔中國的輸出量11-14%，就好似set一個士碌架一樣，對方有86-89%打到指定的桌球，換句話說，成功率非常低，特朗普應該禁止中國貨物輸往所有國家，才可以令中國屈服，如果做唔到就唔應該向中國徵收關稅。

　　最奇怪就是特朗普除了向中國set士碌架之外，同時亦向全世界set士碌架，即是徵收關稅，特朗普唔知道咁樣做即是自己set自己士碌架，全世界都唔向美國供貨，最後令到美國超市的貨架空空如也，受到最大損失的始終是美國，唔通特朗普唔明白，士碌架的意思是set死對手而不是set死自己。