茶餐廳手記（#802）九記牛腩點解可以成為網紅店

　　今日早上去到茶餐廳，有客人話在佛誕假期去了九記牛腩，老實說，出品不過不失，最多可以說是比平均較好，但價錢唔平，招呼又唔好，點解可以成為網紅店，諗極都唔明。

　　今次連老闆都認低威，竟然話唔知點解，不過唔知都唔出奇，除非是了解地產，那些網紅打咭店有一個共通點，就是單邊舖，排隊的人不用霸佔別人舖面，阻住他們做生意，否則一定會有衝突，所以，單邊舖是貴得有道理，不過，仍然要靠出品，服務，價錢來支撐，否則，就算變成網紅店很快就會被打回原形。

　　有客人話，點解有一些食肆，即使唔係單邊舖，例如澳牛，都可以成為網紅店，老實說，那些舖頭一定有一些賣點，才可以成為網紅，澳牛以光速上餐馳名，去澳牛並不是欣賞出品，而是上餐速度，有很多人計時，落咗單之後幾多秒，已經有食物送到，究竟澳牛是點樣可以做到。

　　老闆話，如果要做，他的茶餐廳亦可以做到，只要請多兩個水吧，不斷煎蛋烘多士，做好咗5分鐘之內冇人要就掉咗佢，目的是保持食物是剛剛做起，如果人流足夠，浪費不會很多，所以，如果去那些光速餐廳，大排長龍的時候可以光速上餐，如果冇人排長龍，反而要等一陣，因為真係現叫現做，否則就的確很浪費，不過，一般人只會講餐廳咁多人都可以光速出餐，想唔做網紅打卡店都唔得。