有老友話近日去了商場內的食肆，發覺冇乜人，大酒樓更慘，可以容納四、五百人的大酒樓只得幾枱客，返工的人多過食飯的人，相信唔使幾耐都要執笠，唔通真係咁多人北上消費，搞到香港酒樓食肆都冇哂生意。
港人北上消費的確有影響，但並不如想像中咁大，酒樓食肆冇生意，並不是香港人北上消費，而是轉移陣地，幾個人去酒樓食飯，蒸條魚，灼十幾両蝦，焗兩隻蟹，加兩碟小菜，埋單隨時兩三千元，
但如果可以自己去街市買海鮮，再交俾食肆烹調，千幾蚊就可以搞掂，最少可以慳超過千元，而且食材更新鮮，更足秤，不過，唔係好多食肆接受來料加工，畢竟食材mark up才是食肆收入主要來源。
曾幾何時，我們聽到不少人講去香港仔鴨脷洲街市買海鮮，然後攞上樓上熟食中心去烹調，現在這種風氣蔓延至其他街市的熟食中心，每晚差不多所有熟食中心都高朋滿座，那些客人是從那裏來，相信他們平時幫襯一般商場酒樓，現在幫襯熟食中心，商場的酒樓冇人幫襯，商場又點會旺。
我們經常都聽到有人講，窮則變，變則通，商場被熟食中心打冧，經營模式一定要學熟食中心才可以生存，如果容許海鮮零售舖頭在商場經營，市民可以在那些舖頭買海鮮，交予商場內的酒樓烹調，一定會令不少食客重返酒樓食飯，畢竟熟食中心的衞生環境與商場差很遠，有人話商場食肆只收加工費，可能生存唔到，唔排除這個可能性，但如果食肆可以來料加工，就唔需要魚缸，請魚王，海鮮沒有損耗，開支減少，便有機會生存，雖然不是一個極佳辦法，但總好過現在束手無策。
