茶餐廳手記（#934）特朗普攞唔到和平獎比攞到更好

　　星期二早上去到茶餐廳，有客人話，算是由特朗普促成的以哈和平協議，今日在埃及簽署。不過，特朗普應該覺得遺憾，促成和平協議但始終攞唔到和平獎。

　　老闆叫客人唔使擔心，特朗普始終會攞和平獎，今次唔攞，下次一定可以攞到，但如果今次攞到，就算簽了和平協議，很快會被推翻，攞唔到就唔同，如果以哈雙方，尤其是以色列破壞協議，特朗普一定會用行政手段制裁以色列，例如唔供應軍火俾以色列，否則下次都唔使旨意攞到，評審只會話，好彩冇頒和平獎俾特朗普，現在加沙地區至少有一年和平。

　　今次和平協議最大輸家其實是以色列，已經將加沙打到溶溶爛爛，地面部隊準備進入，將巴勒斯坦人趕離加沙，現在突然達成和平協議，以色列地面部隊進入加沙無望，兩年加沙戰爭其實是白打，雖然巴勒斯坦死了七八萬人，不但沒有收到預期效果，反而將復仇種子埋在巴勒斯坦人心𥚃，反噬力度會愈大，以復建來說，以色列用了兩年將加沙打到溶溶爛爛，不出三個月就可以復原八、九成，而且相比戰前可以獲得更多資源，個人更加自由，到了明年，和平獎公報的時候，加沙又再次成為以色列心腹大患，屆時以色列未必夠膽打加沙，否則會影響特朗普攞和平獎，所以，今次停戰協議以色列應該是大輸家，為特朗普攞和平獎，要付出很大代價。