茶餐廳手記（#932）YouTuber 現在忙於刪post

　　星期六早上去到茶餐廳，有客人話，一覺醒來，道指納斯達跌近900點，夜期跌近800點，但相信在週一開市，下跌千點應該冇懸念，比特幣更加傷，唔見咗一萬美元一粒，揸十粒八粒，已經輸咗一間細價樓首期，悲觀的人會話唔見咗好多身家，樂觀的人會話，又是一個入市良機，客人話，一向鍾意望人閉翳的YouTuber 一定好開心，可慢慢講，逐個唱。

　　老闆話如果發生在一個星期前，他們一定很開心，但今日就唔會，不但唔會逐個唱，而且仲要嗱嗱臨刪post，如果被辣到，今次真係非同小可。

　　有客人唔明白，老闆話在週中，大哥大嫂在報紙刊登全版啓示，警告那些詆毀佢，謠傳佢投資輸了百億，被銀行call loan的傳媒以及YouTuber ，尤其是某些YouTuber 在不了解真相的情況下加鹽加醋，給予大哥大嫂相當不便，現在大哥出到聲，那些YouTuber 震過貓王，他們雖然身處海外，但現在是天涯若比鄰，某日回家發覺有一隻死貓在門口就大件事，所以，現在嗱嗱臨刪post，希望大哥大嫂沒有留意自己。

　　其實那些YouTuber應該知道，他們亂咁講，會給當事人帶來相當不便，好似我賣自住樓，全世界最少有100個post講，當然唔會講得好啦，不少已經幾十年冇聯繫的大學同學，都打電話搵我問我係咪好唔掂，點解要賣自住樓，頗有幸災樂禍嘅味道，我話好簡單，我賣了自住樓收了1.38億，以5%計算，每年慳700萬利息，用年租100萬租返一間豪宅每年慳了600萬，即是每月50萬，條數真係好易計，但YouTuber好似唔明，淨係唱唱唱，唔係唔掂都唔會賣自住樓，老實說，我兩公婆，兩個工人，住咁大地方真係浪費，其實，我十分期待有一個YouTuber贊我識計數，但我唔記得YouTuber只會望別人閉翳，不會望別人富貴。