星期三早上，在10號風球仍然懸掛下去到茶餐廳，竟然有不少客人在座，伙記照常返工，有客人問伙記點解10號風球仍然返工，伙記話住得不遠，唔返工又冇嘢做，而且老闆又出到三工，所以咪返工，客人問點解老闆又唔加價，是否回饋顧客。
老闆話唔係，如果加價就會俾熟客話趁火打劫，做衰個口碑，甚至會俾人鬧同的士司機落雨冚旗加價有什麼分別，就算唔加價都唔會蝕，只是賺少一些，伙記又開心，客人又有地方飲咖啡，何樂而不為。
今次樺加沙襲港，香港的防風措施的確做得唔錯，雖然有人話8號風球可能掛早咗，到入黑很多地方仍然很平靜，其實，全世界都預測樺加沙是一個超強颱風，早些掛8號等大家可以一早返屋企，如果六、七點才掛，
街上塞滿人，有意外就會俾市民指責，政府與天文台其實做得唔錯。
老闆話，沒有比較就沒有傷害，樺加沙在襲港之前先襲台灣花蓮，做成17人死亡，如果發生在香港，政府一定會俾人鬧到發癲，到現時為止，除了去觀浪的一家四口發生意外之外，仲未聽到有傷亡消息，台灣花蓮人口31萬，香港750萬，如果香港沒有意外死亡，政府防風措施以及市民意識應該抵讚。
