茶餐廳手記（#916）H1B簽證是人力資源關稅

　　星期二早上打風前夕，整個香港都有山雨欲來風滿樓感覺，不少食肆早已宣布星期二晚及星期三全日休息，街市超市被搶購一空，每斤菜芯買到50元，有人話搶錢，但明買明賣，唔算係搶，去到茶餐廳聽到有客人問老闆點解唔加價，就算加三成都大把人幫襯。

　　老闆話加一日半日，做壞個朵，要加價就要學特朗普，關稅一加，就唔知加幾多年，而且長加長有，雖然有學者話，加關稅是羊毛出在羊身上，最終由美國佬埋單，但美國人冇咁醒目，以為關稅是由生產商付，所以反對聲音很少，特朗普基本上是成功的。

　　老實說，真係冇辦法唔讚特朗普，見到商品關稅成功，立刻推出人力資源關稅，將H1B簽證由幾千美元大幅提升至十萬美元，特朗普當然話希望美國人可以請返美國人，話就係咁話，但美國並沒有咁多高端科技人材 ，否則都唔使輸入，徵收人力資源關稅其實是削弱美國競爭力，不過，唔係咁多美國人認識這個道理，他們會認為特朗普做得極對，除了要多聘用美國人之外，仲會為庫房帶來千億美元稅收，而且長收長有。

　　有客人，今次中國大鑊了，一定會為美國人力資源關稅貢獻不少，老闆話，對比印度，中國只是小兒科，千億關稅，印度佔七成，中國佔成半，莫迪頭都痛，都唔知點收科，唔通真係要向特朗普投降。