星期六早上去到茶餐廳 ，有客話有一個朋友用物業抵押問佢借錢，現在朋友冇錢還，不過同意將物業賣俾佢，客人話由債主變業主真係慘，可能要蝕多少錢，不過物業質素唔錯，假以時日一定有錢賺，老闆話，既然如此，就唔好想咁多，快快脆脆買落嚟，遲吓可能有變。
朋友與朋友之間按揭屬於私人性質，如果債仔冇錢還，債主買下所按的物業亦冇問題，但如果是銀行就要小心，銀行如果買入不還款債仔的物業，必須依正規矩，同時要俾足夠時間債仔贖回所按的物業，在再三確認債仔冇錢還，變成銀主盤之後才可以拍賣，最好買賣俾冇關係的第三者，銀行雖然是可以買入，但如果在買入之後樓價繼續下跌，銀行是會受到股東或者股票持有人的質疑，一般來說，除非有十足把握，銀行是不會買入客戶所按的物業，
風險未必很高，但就會引人話柄。
客人話，朋友俾多一個選擇給佢揀，就是入股做朋友公司的股東，所欠的錢作為入股資金，我話千祈唔好，如果他朋友公司做得好，今日就有錢還，梗係做得唔好，才會俾老友沒收他的物業，現在買下朋友的物業，最多是由債主變業主，但如果入股他朋友的公司，就會由債主變債仔，要應付公司其他債主的追討，真係攞苦嚟辛，所以，最直接了當就是買下朋友所按的物業，即使蝕多少都冇問題，最多當幫了朋友，千祈唔好入股做股東，尤其是做大股東，以後就會很煩。
