今日早上去到茶餐廳，發覺大家都舒口氣，美聯儲局鮑威爾終於話9月會減息，星期五道指升近900點，有客人話大多數香港人並不是擔心恆指是否會爆升，而是唔減息，聯繫匯率有機會再觸及弱方保證，銀行體系結餘繼續下跌，同業拆息就會繼續上升，香港業主又要捱貴息。
老闆話，今次觸及弱方保證與以往不同，以往是在投資者沽港元離開香港，印證港幣的確很弱，但今次聯匯觸及弱方保證反證港幣在強方，雖然一定會有很多人不同意，甚至認為這是歪理，但在座的一位米芝蓮大廚可以做證，大廚在十年前離開香港，回國內搵食，走遍大江南北，收取三倍香港薪金，做十年等於三十年，現在可以退休，當他離開香港時，不少人問佢香港經濟是否很差，所以他要離開香港搵食，大廚話唔係，因為其他地方俾到更高薪金，如果薪酬相若，一定唔會離開香，大家話唔明。
一隻貨幣強弱，一定要與利息掛勾，美元有一段時間是零息甚至負利率，但全世界資金都買美元，
這代表美元在強方，現在十年美債利息超過4%，相對很多只是2-3%利息的國家是弱方，香港更加唔使講，在今次未加息之前，一個月同業拆息只是1%，現在是2.8%，投資者點解唔借港元，沽港元，買美元，即使7.85沽，7.75買港元，以一億美元為例，蝕了一千萬港元，但賺了3%利息，合計2340萬港元，更何況未必要用7.75買返港元，咁樣就賺得更多。
港元就好似米芝蓮大廚，出外搵食主要是因為薪金高，1%利息港元出外搵食，收取4%美元利息，強弱之勢十分明顯，特朗普睇通形勢，所以不斷叫鮑威爾減息，否則就會俾貨幣炒家做套戥，不但賺哂美國利息，而且仲令美國非常丟架。
有客人問，點解香港同業拆息急升，老闆話主要是貨幣炒家篤爆銀行體系結餘個波，不過今日大家都忙，有時間繼續講。
