茶餐廳手記（#885）如何做旺一個商場

　　今日早上去到茶餐廳，有客人話昨晚去了一個稍有名氣，但唔係好大商場，情況真係慘不忍睹，不但商舖生意唔好，連有名氣食肆都慘淡經營，食肆老闆話已經推出不少優惠，但只是一輪虛火，貪小便宜的人會愈來愈貪，優惠很快就不能滿足他們，要推出更多優惠，究竟點樣才可以做旺一個商場。

　　老闆話，山不在高，有仙則名，水不在深，有龍則靈，商場大小是另一個問題，無論大小，必定要有一個核心動力，大家話商場冇生意，但是街市內的熟食中心不知幾好生意，客人並不是叫牛河小炒，而且食海鮮，不過，是由他們自帶的海鮮，客人從街市買了海鮮，交俾熟食中心的檔口加工，老實說，海鮮連加工費，隨時貴過一間普通食肆，而且環境比食肆差，但是客人甘之如飴，所以，一定要有一個核心動力，才可以搞旺商場。

　　現在的商場缺乏一個賣海鮮的舖位，如果商場能夠騰出一個位置俾漁檔，而商場食肆又歡迎來料加工，一定會吸引一些去街市熟食中心食漁鮮的客人，他們鍾意自己揀海鮮，交由商場內的食肆加工，海鮮檔有生意不在話下，食肆亦會節省不少成本，不用自設魚缸，不用請魚王，更加沒有損耗，請一個上雜負責蒸魚就搞掂，去熟食中心食海鮮的人其實唔想去，環境又唔好，又唔係咁平，不過，就滿足他們可以自己揀海鮮樂趣，所以，商場唔作出改革，冇生意就唔好怨天怨地，減價並不是不二法門，最後經營者要將貨就價，生意會愈做愈差。