Full Paid 買樓，就是贏家

　　有老友同我講，樓價下跌了三成，他的身家也下跌了三成，真係好傷，我叫老友唔好曬命，相比其他問銀行借錢買樓的業主，他就是贏家，同我講無問題，同其他業主講，我擔心會俾人打。

　　樓價下跌三成，身家唔見三成，代表老友是Full Paid 買樓，如果用Full Paid 買樓，就是贏家，買樓的人大多數都會問銀行借錢， Full Paid買樓的人唔係咁多，贏家亦唔係咁多．不過好彩有逆週期措施，一般業主最多只能夠借樓價四成，身家是樓價六成，當樓價下跌三成，代表他們的身家唔見了一半，老友比其他業主輸少好多，就是贏家。

　　無論是Full Paid 或者借四成按揭，相信仍然可以捱得過今次難關，最大鑊就是有不少人用按揭保險，或者銀行職員可以借足九成，現在已經是負資產者，他們連本都輸埋，唔畀人話輸家都唔得。

　　有人話，政府的按保只是提供一條渠道，買樓的人要量力而為，老實說，那些初次買樓的人如果可以量力而為，樓市就不會有危機，問題是初次買樓的人心口揹個「勇」字，見到政府提供九成按揭，認為政府睇好後市，又點會唔買，最後輸到連渣都冇，所以，以Full Paid 買樓的人千祈唔好話自己是輸家，真係會俾人打。