遲到好過唔到的施政報告

　　林鄭幾經艱苦，但仍然唔能夠在立法會宣讀施政報告，誰是誰非大家都無謂爭拗，不如講番份施政報告。有人話睇到份施政報告立刻火滾，這是一份推初次置業者落火坑的施政報告。現在樓價仍然處於高位，政府竟然將按保的金額提高，九成的由400萬去到800萬，八成的更加去到1,000萬，絕對是替地產商托市。我的睇法與他們不同，我認為政府是聽從民意，所以才大膽提高按保金額。在過去十年，我們不時聽到有人話買唔到樓，錯失了樓價上升良機。他們並不是供不起，而是唔夠首期，唯有買那些一個人都唔夠住的納米樓。今次特首大膽提高按保，不但可以幫助那些有心上車的人，同時啓動換樓鏈，並且給予正在下跌樓市一點承托力。至於是否要用九成按保買樓，就要視乎各人能力，與放寬按保的影響不大。

　　政府打算以兩折出售租者有其屋餘下4萬2千個單位，我相信全部會由租戶承接，不會有大問題，但政府以後都唔好將公屋出售，否則就會好心做壞事。我了解到有不少公屋租戶以低價買入了自住公屋單位之後，抵不住誘惑將自己擁有的公屋單位賣走，最後要露宿街頭，但政府現在唔賣又唔得。否則在一個屋村內有政府單位，又有私人單位，在維修，管理上是很麻煩。而事實上出售公屋是一個最劣的房屋政策，希望政府以後唔會再犯錯。

　　林鄭在上任之後，搞了一個土地供應專責小組，但始終解決唔到土地供應不足問題。小組提出了18個方案，但並沒有提及要用土地收回條例，向地產商徵收土地。林鄭在施政報告內提及未來五年，要向地產商收回450公頃土地，足夠起30萬個500呎單位，再加上政府現在的土地儲備，地產商補地價得到的土地，土地共享計劃以及由工廈改用途所得的土地。如果可以落實，土地供應根本不是問題，上述這些都是中期供應，還有各項填海計劃，供應充足，樓市應該在未來一段長時間會平穩發展。

　　今次施政報告令地產商最擔心的地方就是限購令，好彩林鄭連提都冇提，只是提供1,000個港人港置單位應酬大家，地產商應該鬆一口氣。有不少人問我林鄭這份施政報告值幾多分，如果是去年的話，我會俾80分，今年我扣10分，只值70分，原因是遲了一年。不過，遲到好過唔到。