今日冇返工，下午落會所飲杯水，有住客話，美財長貝森特好大口氣話，美債市佢做莊，然後不斷加息，評級AA+的10年美債息5.26 ％，比AA級的主權債差不了多少，如果美國係莊家，利息只有低不會高，理由是美債安全，流通量又高，貝森特唔了解莊家的意思。
住客雖然講得冇錯，但是唔了解莊家的意思，老實說，傅老榕，何鴻燊都唔想做大家都以為的那種莊家，其實，莊家是服務行業，保證贏了錢的人可以攞到走，希望買大買細，買莊買閒的注碼是相若，自己從中抽水，莊家獲得最大利益，最唔鍾意注碼一面倒，莊家被迫落場，自己變成賭仔焗賭，咁就有可能輸錢。
大家千祈唔好睇少抽水，每鋪抽5%，莊家賺的蠅頭小利，其實，以每張枱總投注額100萬計算，有50萬贏錢，抽水25000，一個鐘頭開10鋪，一日開10個鐘頭，總抽水250萬，莊家基本上是贏穩，使乜同你賭，所以，如果貝森特是莊家，就平息賣美債，高息借俾人，從中抽水，贏梗，現在剛好相反，應該敵莊家 AntiBanker。
