租客同業主買樓隨時有驚喜收入

　　一年前，有一個租樓的同事話業主好等錢用，希望同事可以買下他租用的物業，同事問我意見，我話樓市已經差不多見底，就算下跌幅度亦不會很大，不過，就算回升，都唔會升得太快，既然是業主等錢用，如果低於市價是可以考慮，況且又唔使俾代理佣金，連裝修費都慳埋，又唔使上屋搬下屋，慳返一籮穀，而且，銀行是樂於承做自住物業的按揭，買下自己租用的單位算是可遇不可求，否則，被其他人買了，租約到期有機會要搬走。

　　同事有了我的鼓勵，於是大膽買下租用的單位，供樓利息與租金差不多，同事除了支付兩成首期之外，其實什麼都沒有變化，但身份就由一個租客變做業主，最近同事的身份又有變化，再次從一個業主變返做租客，不過就多了一大筆收入，可以做定期或者買一些理財產品，幫補一下租金。

　　原來在過年之後，有買家有興趣同事的單位，可以售後租回，出價比同事的買入價高兩成，租金同以前差不多，今次同事冇問我意見，將自住單位賣走，同事可能唔知道，就算他問我的意見，我都會叫他賣走，賺錢為上，就算樓價繼續上升，都只不過是賺少咗，但如果我叫同事唔好賣樓，萬一樓價下跌，不但冇錢賺，甚至要蝕本，同事一定會怨我，咁蠢的事我唔會做嘅。