這兩年做物業投資的人可以說流年不利，由於樓價下跌，不少持有多個物業的投資者被銀行要求補差額，有股票的物業投資者唯有變賣股票用嚟補差額，誰不知股票上升，樓價下跌，令到物業投資受到雙重打擊，損失慘重，有人話物業投資者在適當時樓換股，他們冇做，損失是自己攞嚟，老實說，要業主賣樓買股是很艱難，因為他們始終覺得物業比較踏實，股票比較虛浮。
由於銀行不斷要求補差額，令到有現金在手的物業投資者都唔敢買股票，甚至要賣股來滿足銀行要求，而錯失了今次股市升浪，不過，做投資就是這樣的，如果能夠在適當時候走位，變賣一些物業轉買股票，獲利可能會更大，但是唔
係好多投資者可以做到，所以，現在股市獲利的投資者應考慮逆向而行，賣走手上一些股票，轉而買物業，最後可能會有更大收獲，大家可以在市場上見到不少比較大單的交易，甚至不用向銀行借錢，原來是從股票賺返嚟，否則，以現時環境，銀行唔借錢俾人買樓，根本很難出現大單買賣，股市升拯救了不少物業投資者。
有人問我現在甲廈抵唔抵買，我話問任何一個分析員都話唔抵，就好似當日匯豐30元，不少分析員認為股票仍然會下跌，跌至18元已經非常樂觀，到了今日，匯豐超過110元，那些分析員當然提都唔敢提。今日有不少甲廈，當日做過成交價五萬元一呎，今日萬五元都冇，情況好似匯豐一樣，如果有問人我抵唔抵買，今日唔抵，但日後就好抵。
