在農曆新年期間，有不少國內老友嚟香港拜年，順便睇吓學校，睇吓樓，不少老友都打算將小朋友送嚟香港讀中學，日後去外國甚至回國升學都比較方便，買一層樓亦順理成章，不過，一切都等2月28日之後，因為當日是財爺恭讀財政預算案，有很大機會會撤銷辣招，即是非香港人買樓不用付15 ％特別印花稅。
大家又千祈唔好以為如果財爺唔撤辣，內地人是不會買樓，我認為是有影響，但不至於不會買樓，因為大家都估
計，無論是否撤辣，香港政府決定之後，起碼有三、五年不會改變，如果撤辣，買樓內地人就會多些，唔撤就會少一些，不過唔撤辣，樓價繼續下跌，地產商又唔買地，政府很難解決巨額財赤問題，當然，即使撤辣，樓市亦不會立刻調頭升，只是會多了人睇樓買樓，繼續下跌的機會就會減少，總之，撤辣就好似如箭在弦，不得不發。
即使政府撤辣，甚至將正常買樓印花稅減半，但如果銀行唔借錢俾人買樓，撤辣都是徒勞無功，去年樓價下跌其中一個原因，就是很難問銀行借錢買樓，而銀行反而向按揭借貸比率不足五成的客戶追收差額，令到供應增加，需求減少，樓價就點會唔跌，好彩最近銀行估價稍為回升，銀行不再以估價下跌理由向客戶追收差額，業主可以鬆一口氣，樓市亦會鬆一口氣。
其實除了內地人之外，亦有不少香港人等財政預算案後才買樓，因為如果唔撤辣，他們仍然可以慢慢揀，慢慢鋤價，如果撤辣，就會加快買樓腳步，否則，有機會唔夠現在要俾特別印花稅的人爭。
