茶餐廳手記（#906）物業投資者錯過了今次股市升浪

　　今早去到茶餐廳，有客人話恆指升超過2萬6，股市又成為人們飯前飯後談話內容，相信大部分人都在股市搵到錢，所以消費市場亦比較旺，尤其是蘭桂坊，有酒吧食肆經營者話生意已經有全盛時期八成，希望唔好係虛火，不過有一個怪現象，就是股票投資者不時會講下買樓，反之物業投資者很少講股票，唔通物業投資者收心養性，連股票都唔玩，客人可能唔知道，物業投資者唔係唔想玩股票，而是唔敢玩。

　　老闆話，以優才專才為首，大約25萬人的高消費群不斷湧入香港，中高檔消費市場的確有起色，不過股市雖然暢旺，但並不是所有人都得益，在銀行call loan之下，持有物業的投資者要預留資金應付銀行，唔敢投資股市，錯過了今次股市升浪，不過，從股市獲利是其次，最緊要是可以渡過今次難關。

　　老實說，今次香港的物業投資者可以說是完敗，從國內來的資金因為不需要應付銀行call loan，可以全力投資股票，在六個月之後，累積了一定的利潤，就會轉去投資地產，就算樓價比六個月前略有升幅，但相比股票收獲，根本是微不足道，所以，亦有不少人話，當股市升了六個月之後就會輪到樓市，就是這個道理，其實唔係輪到，而是係投資者在股票市場搵夠，就會搵一些低水位投資，在現時環境，唔係物業又係乜，不過，又不是所有物業都值得投資，住宅當然可以，甲廈舖位亦不俗，商場就要小心一些，施羅德都玩唔掂，一般投資者又點識玩。