茶餐廳手記（#829）物業代理可能變成炒家

　　有同事話，最近整理一下已經出售價值十幾億物業的過程，發覺有一件事，那些物業曾經被出低價，但我唔肯賣，最後又可以做到我要的價。

　　現在物業交易市場有少少不正常，物業代理身兼兩職，除了做介紹人之外，仲做埋投資者， 他們見到一些荀盤，知道業主等錢用，或者被銀行迫得冇掟走，就算價錢不理想都要賣，接手的人很快就可以摸走兼有不俗利潤，原業主一定唔會開心，如果是打工的，分分鐘被老闆炒魷，所以，負責的人要非常小心，蝕錢唔緊要，千祈唔好被買家摸走。

　　雖然代理做炒家並不是太道德，不過，如果代理預先表態物業是他與朋友聯手購買，這不但沒有道德上問題，反而可以證明物業代理對樓市亦有信心，否則就唔會自己落搭，不過過往出現的都是一些小型單位，銀碼不大，代理可以自己承受，但現在出現的是比較大的單位，代表物業代理的信心正在加強。

　　同事話有學者表示，樓價仍然會跌多一半，代理做炒家的情況應該不會出現，唔好理那些學者講什麼，他們只是語不驚人死不休，樓價下跌，他們會出嚟認屎認屁，如果樓價上升，那些學者就會自動失蹤，記得去年底，有玄學者話今年樓市會下跌兩成，就嚟過了一半，樓市仍然平穩，升跌不足1%，我的睇法是在優才專才學子湧港，租金上升，利息下跌的情況下，樓價有5%升幅絕不出奇，雖然有人話我既然睇得咁好，點解唔買樓，很簡單，我冇錢。