茶餐廳手記（#819）收租佬最忌收返間舖自己做

　　今日早上去到茶餐廳，有客人見生意唔錯，問老闆是否擔心業主收返間舖自己做，以往有不少業主見租客做得唔錯，即使租客俾市值租金，而且交租又準時，都唔租比個客，收返間舖自己做同樣生意。

　　老闆話的確擔心，而且他自己亦試過被業主收返間舖，所以，扚起心肝買舖位自己做，不過，結果顯示，收返間舖的業主大多數做唔掂，最後再租出亦不理想，不斷要換租客，甚至令舖位長期空置，老實說，如果做業主沒有讓租客賺錢量度，千祈唔好做業主。

　　外媒報導，澳洲政府打算收回中國嵐橋集團租用的達爾文港，將港口國有化或者轉租至美國紐約的私募基金博龍資本管理，嵐橋已經表示無意出售港口。

　　澳洲政府咁樣做即是同業主收返間舖一樣，當日澳洲政府做唔掂，在長期蝕本下才以5億多澳元租給嵐橋，現在嵐橋有錢賺，澳洲政府又話要收回，一個業主咁樣做都會被人話小家，更何況是一個國家。老實說，嵐橋有錢賺最緊要是得到中國公司支持，而貨運暢旺，最終受益者是澳洲政府，收回嵐橋達爾文港的使用權，即是破壞合約，並且並不是破壞一份合約咁簡單，以後中澳交易基本是沒有合約精神，所以，我個人認為收回是不會成功，而澳洲政府亦藉此表示，中澳要尊重合約精神，唔好失驚無神話停止牛肉，澳龍，紅酒等。