茶餐廳手記（#792）地產商最怕新樓盤入伙時烏燈黑火

　　今日早上去到茶餐廳，有客人話在年初時地產商接受傳媒訪問，都會話今年會推出幾多個單位發售，但只見樓梯響，今年過了接近三分一，只是賣了兩三千個單位，當中大部分是貨尾單位，長期樓花是絕無僅有，盼星星盼月亮，終於望到有地產商以低於市價，甚至低於成本價推出新樓樓花，樓市才有機會反彈，否則，就算樓價唔跌，都只是一個悶局。

　　老闆話，樓市高高低低是一個循環，如果地產商在樓價最高的時候開盤賣樓花，就算可以賣過滿堂紅，但就會面對樓市回落，買家撻訂，一個本來已售罄的樓盤，到入伙時空置率非常高，地產商在樓市不景時要重售那些單位是很困難，最後樓盤的利潤會大幅下降，不但有機會蝕本，甚至變成爛尾樓，雖然在香港不會發生，但在國內，這個情況就時有所聞，所以，在樓市暢旺時賣樓花是機會面對大量撻訂情況。

　　反之如果地產商在樓市低迷時以低價促銷，就可以確保買家不會撻訂，如果賣得好可以加價繼續賣，令到當初用低價買樓的人非常開心，他們甚至可以加價賣走當日買入的單位，無形中替樓盤的樓價築底，樓市反而有反彈機會，到新樓盤入伙時唔會出現地產商最擔心的烏燈黑火情況。所以，在樓市低迷時開盤並非下策，不過，一般地產商都不屑為之，他們寧願賣貨尾單位，待樓市反彈才賣樓，如果地產商唔替新樓盤築底，樓價又點會反彈。