茶餐廳手記（#1086）俱樂部應趁補地價去蕪存菁

　　今日早上去到茶餐廳，有客人話今次真係要多謝政府，客人有返咁上下年紀，亦有多少地位，參加了不少以體育會為名的富豪俱樂部，每個月要俾成兩萬元會費，唔係一個，而是五、六個俱樂部，佢一早打算取消當中幾個，只剩馬會同另一個俱樂部，但係唔捨得，如果政府要求補地價，俱樂部一定會轉架到會員，到時候唔捨得都要捨得，但係唔知取消那些俱樂部。

　　老闆話，唔使問阿貴，首先一定取消擁有俗稱番鬼佬碌嘢lawn bowling的俱樂部，除了lawn bowling 之外，其他又沒有特色，白交會費替人養俱樂部，不過，無端端退出又唔抵，如果要補地價，早日退出就一了百了，每月慳返唔少。

　　現在有很多老牌富豪體育俱樂部，會員人口老化，消費力不高，雖然唔使蝕本，但主要是有會費補貼，所以，俱樂部要有活力，一定要年輕化，況且現在有大量國內優才希望可以入會，年輕化是很容易做到，但點樣可以叫那些年紀老邁的會員離開，政府要求的補地價如果分攤到會員，一定會有一些會員放棄會籍，但是不足夠。

　　俱樂部應該向放棄會籍的會員發放特惠津貼，假定入會費是100萬元，放棄會籍的特惠津貼是50萬元，似乎是很多，但會所除笨有精，淨袋50萬元，而且，新會員對補地價是不會有意見，如果留返那些老會員，對補地價就會有很大反對聲音。