朋友

　　本來今早我想寫武則天，但我睇完回應，便先寫朋友，有網友問我是否當他們是朋友，如果我話係，表示我將朋友定義定得太低，變成朋友滿天下，其實，什麼是朋友，真的是很難有一個定義，或者定義在各人心中。坊間有很多朋友定義，例如為朋友兩肋插刀，朋友有通財之義，都是那些人有求於人，希望對方幫忙，便會當對方是朋友時所講的說話，就算別人幫了他們，那些人亦會說大家是朋友，唔使講嘢，他們根本上唔想其他人知道有人曾經幫了他，反過來要他們幫助，就會推三搪四，這些事我見得多，所以我唔會上心，唔上心，即是唔會知心，又唔會傷心，點會係朋友。

　　朋友定義，即是雙方知心，又會為對方傷心，在李陵答蘇武書中，李陵話，人之相知，貴相知心，這是做朋友最基本定義，再深入我唔識講，因為我都唔識喊，就算我阿媽，阿嫲過身，我都冇喊，甚至唔係幾傷心，我認為會有另一個世界等待她們，我阿嫲去的是極樂世界，我阿媽去的是天堂，既然如此，仲有乜好傷心。有人曾經問我點樣撇一個老友，我教了他點做，本來我唔想講，但唔講又唔能夠將朋友定義推上另外一個階梯，我寫給他「人之傷之，貴傷之心」，佢成功咗。

　　有人問我，某幾位物業代理替我們做很多生意，我一定同他們很老友，我話唔係，甚至連兩個人單獨食餐飯，飲杯酒都唔會，人多食飯就會有，但唔會要他們找數，不過，我俾足佣金，而且很快，所以，投資者三字真言「快，狠，準」，在不同時間，有不同演繹，大家要靈活運用，如果有人話同那些物業代理老友，但又唔付足佣金，佢有靚盤至奇，我的意見是，就算付足佣金，都唔好同物業代理太老友，他們都有生活壓力，當他們交唔到數時，就會向老友埋手，我見過不少投資者為此損失慘重，但又唔出得聲，是否很慘。
 
　　我對網友的確是以對朋友態度相對，否則就唔會將我的意見講出來，其實，我最鍾意聽的說話就是網友說唔同意我的說法，以「細價樓爆煲論」為例，差不多全部不同意我的意見，搞到差點連我自己都不同意，但冇所謂，網友唔同意代表他們有獨立思考，但又唔能夠強迫我接受他們的意見，有唔同意見的人能夠在一起，這才是真正朋友，這才是李陵所說，人之相知，貴相知心的意思。這篇文章寫了一個半小時，很累。