在一個世界杯估波論壇，沈大師與我亦在其中，經過9日9場比賽之後，我連贏9場，大師就2勝1和6負，論壇中有人話不需要考慮，只要搵大師做明燈便可以，令到大師甚為煩惱，佢話做燈做到厭，大師不是澳門人，不知道一件連澳門人也未必知道關於明燈的事，什麼人要搵明燈，就是那些輸到驚，但又要繼續賭的人，如果是順風順水贏緊錢，點解要搵明燈指路，所以，搵明燈指路的人其實比做明燈的人更慘，其實，賭錢的人十賭九輸，根本不用搵明燈，只要隨便在賭場搵一個賭徒，當他輸清光，搵他做明燈的人就會贏到盤滿砵滿。
我在農曆年初時與大師一起與有線做節目，節目名稱是兩盞明燈耀股樓，有聽眾話今年會買樓，因為我
睇淡樓市，我奇怪那位觀眾點解要等到供應大增，利息上升的時候才買樓，他的回答是因爲我在過去很多年都睇好樓市，而他一早已經認定我是明燈，我睇好樓市令到他不敢買樓，到了現在我睇唔好樓市，他就夠膽買樓，其實，我不大了解他的概念，或者他並不是頂白，而是頂紅，想唔輸死都唔得，而事實上投資股票買樓是有別於去賭錢，投資是可以締造雙贏局面，毋須刻意跟紅或者頂白，只要跟著自己實力以及概念去做便可以，有運固然是好，就算無運，只要有能力捱過難關，到最後都會是勝利者，大家記住，話要搵人做明燈，即是話俾對方知道自己比他更慘，要靠他打救。
